DEJA VU

RAN VULH CHUNGCHANG:

                Ran hi a tam zawk chuan kan vulh theuh awm e. In chhungkhur ah hlimna thlen thin in, in lo nghaktu ah te hmangin, kan thiante karah pawh in tihtheih nan ka vulh thin a ni. Vaki khawi te chuan tawng te zirtir in, faifuk ri ang deuh reuh si a, kan thusawi an lo sawi chhan emaw, an mahni te a an sawi te hian tam tak chuan mak kan ti in kan hlim pui e mem a ni. Keini Mizo te chuan, ui leh zawhte hi kan vulh deuh tlangpui in ka hria. Kan vulh chhan ber chu, in lo veng tu tur emaw sazu awm loh nan te emaw chauh a ni thin. Kan ran vulhte chuangah chuan mi thenkhatte chuan, nun rawng takin an enkawl a; kan thinrim chang in kan pet in tiang hmang ten kan vaw leh mai mai thin a; Chaw pawh kan ei peih tawh loh hnu athing te kan pe leh mai mai thin a ni. Kan Mizo thenkhat ten ransa an vulhte chungah ngilnei taka an khawsak pui lai in thenkhatte erawh chuan an vulh chhan ber pawh awm chuang lovin, midang ten an vulh vanga lo vulh ve mai mai te kan awm thin. Khawpui pawn lam ah chuan an ui vulh te chu, thianza hovin Zu hmeh atan an talh leh mai thin ani. Sa ei miah loh tur ka tih na chu a ni lova, eitur a kan vulh chi chu a dang a; Hun remchang dangah ziah ka lo tum dawn nia. Mak ka tih em em thin leh zawhna ka neih chu, “Engtinnge kum tel a kan chenpui, chhunkua zing a mi anga lo chetla ve tho chu, hmangaihna nei miah lova an ei mai theih?” tih hi a ni.

Khawvel hmun hrang hrang ah hian ran an vulh nasa a, engtinnge an tih bik? tih hi I lo thlir ho ang u. Sap ho hian, han ti mai ila, kan hnam ngaihsan ber te an nih avangin, ransa an vulh reng reng in, chhungkua member pakhatah an ngai tawp a, PETS an ti mai thin a ni. Ei leh in tha tha te pe in an damloh hunah damdawi in tha berah te pan puiin an duat em em thin a ni. An in tohdelh dan a zirin an ran vulh te ei atan man to emaw tlawm deuh te chu an lei sak thin a ni. An thla tin hlawh mil zelin an awmpui tur ransa chu ei leh in, dam loh chang a in enkawlna man tur thlengin an lo duang lawk sa thin a ni. Thiantha, unau leh chhungkaw member pakhat angin an Pets chu an duat e mem in, khawlaiah te vah kual puiin, Park ah te an hruai thin a ni. Tawngte an zirtir a, thil chi hrang hrang an zirtir thin bawk a ni. Mi thenkhat chuan, inelna hmunah te hruaiin an thil thiam te mipui hmaah lantirin, lawmman te an dawng hial thin a ni. A tawi zawngin han sawi ila, an ran vulh chu an lo thi a nih pawn, tha takin an vui laim mai thin a ni.

Kan Mizo mi tam zawk te tih dan nen chuan a in ang lo hle tih kan hriat tlan theuh ka ring. Kan dinhmun mil a zir hian khawsak dan I thiam ang u. Kum zabi 21 na ah kan cheng tawh a, hman lai pi leh pu te hunlai ah kan cheng tawh lo tih hria ila, khawvel mihringte kan pung chak in, thiamna leh finna te pawh a pung chho tial tial bawk a, inchhung khur khawsak a har tulh tulh mai dawn ani. Chuvangin, ransa vulh ngei ngei hi a tul hran lova, a enkawl na sum leh pai lam a harsatna min thlen dawn ai chuan, vulh loh law law hi a tha awm e. Ransa/Nungcha hmangaih loh tur ka tihna a ni lova, harsa ti chung chunga kan khawsakpui ai chuan, kan vulh loh hian kan hmangaihna kan lantir zawk in ka hria.

Mihring mizia hi kan in ang lo theuhva, pianpui unau ngawih ngawih te inkarah pawh kan nungchang a in persawn hle thin a ni. Kei chuan, ka dinhmun avang leh ka chenna hmun in a zir loh avangin ran ka vulh ve thei lova. Ka Favorite Pet chu Ui a ni. Mahse, tun dinhmun ah hian, ui ka vulh ai chuan, ka mihring pui kawng sira kutdawh emaw, kan Mizo pui, rethei emaw tanpui ka thlang zawk. Hei hian a rukte in ka chhungril ah hlimna min pe a, midangte tanpui thei dinhmunah min siam tu Pathian chungah lawmthu ka sawi fo thin a ni.

Ka Khawsak theih deuh hunah chuan Ui ka la vulh ang.

L SAILO