Mizo 'Ro Hlu' kan tihbo tak chu....

                  'A va tlawmngai ve a' tih hi kan naupan lai kha chuan tawngkam lar tak leh kan hman fo thin a ni a. He tawngkam hi Mizo chhinchhiahna (Identity) a ni. Hnam dang ten min hriat theihna nungchang, kan pi leh pu te Ro chhiah, kan neih awm chhun a ni tawh hial in ka ring. Hmanlai Mizo te kha hnam dang ten an tluk theih loh leh an lo zah thin na em em kha, TLAWMNGAIH NA nun an lo neih vang kha a ni. Kan pi leh pu te kha an in pe zo em em in, midang te tanpui tur khan engtiklai pawn an hman reng thin a ni. Tunlai hun a Office leh Company a hnathawk te nen an hunlai a Lo hna thawk a eiin an zawn dan chu in ang lo mahse, an lo in pe zo hrim hrim a ni. Ro tih tawngkam hi han chhut chian chuan thil hlu leh tam zawng pawn a hriat theih awm e. Mihausa te chuan, sum leh pai tam tak an fate leh tu te thleng a daih tur an hnutchhiah thin a, mahse, an thlah ten an hman thiam loh chuan an ti ral leh vek thin a ni. Kristian sakhuana pawh chutiang bawk in, hmanlai a ringtu mi in hmang leh thahnem ngai tak tak ten an nunna hial chan a Isua hnungzuitu an nihna nungchang chu tuna Kristian te hian kan hlauh tawh a ni. He TLAWMNGAIHNA tih tawngkam hi engtinnge tuna thangthar te hian kan hman chhunzawm zel le?

                   Tuna kan Mizo tih hnam hming hi hnam dang te Review han in pek tir chhin ila, kan nihna diktak chu kan hre thei mai ang. Hman dang ten kan Mizo pi leh pu te an lo hriat thin nen chuan tuna kan Mizo Society hi a danglam hle tawh a ni tih chu hai rual a ni lo. Mihuaisen/Pasaltha ni thin kha, mi dawihzep ah kan chang tawh a; mi rinawm kha mi phakar tih kan ni tawh in, mi tlawmngai thin kha hlawkna zawng kan lo nih phah ta hial a ni. Hei hi hma kan sawn tawh avangin a hman theih tawh loh kan ti dawn em ni? Chutichu, Kut kan neih hunah lah, kan mizo Puan in kan in thuam leh tho si a. Tuna thangthar te ka va demna ni suh se la, kan dinhmun te hian a zir loh zawk vang te pawh a ni hial ang, Mizo hnam hi kan ti hmingchhe tawh a ni. Sum leh pai zawn a harsat tawh avang nge, hlawkna tello chuan kan hun neih leh thiamna te chu midangte tanpuinan, hman kan phal tawh lo a ni. Mahse, chumiavang chuan kan duh dan dan in Mizo nihna Title chu hman phal kan ni kher lo. Ram, sawrkar, khua, kohhran etc., hian dan kan nei vek tih chu kan hre fur awm e.

                      Vairam a kum sawm chuang ka awm avang hian, hnam dang ten Mizo rating min pek hi a hniam hle a ni. Khawvel a changkan tawh avangin Nightclubs, Spa leh intihhlimna hmun hrang hrang ah te hian, kan chhe lar em em mai a ni. Han infuih in han inzilh dawn pawh ni ila, "Min chawm lo aw" tih tawngkam hian indaidanna min siam sak zel a, amaherawhchu, harsatna kan han tawh tak tak hi chuan, 'Khawnge ka Mizo pui te' tih a ni leh lawi si...... Kan duhdan dan a nun leh chet tlat kan duh chuan eng mah beisei lo ngam ila, chu chu 'TIT FOR TATS' an tih chu a ni. Thawkpeih lo chuan a ei pawh ei suh se. 

Khawnge, min thlahtu ten 'Tlawmngaihna' tih ro min pek te chu a awm tak? Kan hralh ta em ni? Hnam dang ten min chhuhsak ta em ni?

                       'What is your contribution to our Mizo Society?' tih zawhna hi nitinin Mizo i in tih chhung chuan lo in zawt ve zel ang che. Ka ziak na deuh a nih pawn, thahnem ka ngaih vangah min lo ngaihsak hlawm dawn nia.